Studiespesialisering

Kvifor velje studiespesialisering?

• Du får studiekompetanse som gjer det mogleg å søkje opptak ved høgskular og universitet
• Du får ei brei allmennutdanning som gjev deg kunnskap både innan språk, historie, realfag (matte, naturfag, kjemi, fysikk, biologi, geofag), religion, geografi, samfunnsfag (sosiologi og sosialantropologi, politikk og menneskerettar, historie og filosofi), engelsk og norsk
• Du får innsikt i samfunnet og dei ordningar som påverkar og formar dette 

Kva kan du bli?

Vel du full fordjuping i realfag vil du få spesiell studiekompetanse, slik at du kan søkje opptak ved til dømes ingeniørstudium, legestudiet og veterinærstudiet.

Vel du fordjuping innan dei andre programfaga, får du generell studiekompetanse og kan søkje opptak til dei aller fleste studium ved høgskule og universitet. Døme på aktuelle yrke er:

• psykolog
• jurist
• lærar
• sjukepleiar
• illustratør
• revisor
• fysioterapeut
• skodespelar
• økonom
• politi
• omsetjar, og mykje, mykje meir

Sterkt klassemiljø og spanande utanlandstur

På Austrheim vidaregåande skule har me éin klasse på kvart trinn i studiespesialisering. Allereie på vg1 legg me stor vekt på å skape eit godt og trygt klassemiljø der alle vert kjende med kvarandre. Slik sikrar me eit samhald som varer gjennom heile skuleløpet og gjer russetida til ei minnerik oppleving for alle. I løpet av dei tre åra kan du også sjå fram til minst ein utanlandstur saman med klassen! Austrheim vgs har meisla ut internasjonalt samarbeid som eit satsingsområde for studiespesialisering framover, og målet er å få på plass utanlandstur kvart av de tre åra.  

Engasjerande og elevaktiv undervisning

Undervisninga vår er spennande, variert og prega av elevaktivitetar. Me legg til rette for utforsking, problemløysing og kommunikasjon, slik at du finn glede i læringa. Med varierte vurderingsmetodar får du vist dine styrkar på ulike måtar, og du vert godt førebudd på vidare studiar. Me gir deg også opplæring i akademisk skriving og korleis du kan skrive fagartiklar på ein god måte. Kritisk tenking og kjeldekritikk er sjølvsagt ein viktig del av undervisninga hjå oss!

Eit breitt og spennande programfagtilbod

På vg2 og vg3 vel du fordjuping innan språk, samfunnsfag og økonomi eller realfag. Du må velje minst to fag innan det valde fordjupingsområdet, og desse følgjer du over to år. I tillegg kan du velje eitt eller to frittståande programfag som passar dine interesser og ambisjonar. 

Er du nysgjerrig på teoretiske fag og har ein draum om å studere ved universitet eller høgskule? Då er studiespesialisering rette valet for deg! Utdanninga går over tre år og gir deg generell studiekompetanse som opnar dører til vidare studiar og moglegheiter.

Friluftsliv – eit annleis og opplevingsrikt programfag

Ynskjer du litt variasjon frå dei teoretiske faga? Friluftsliv er eit av dei frittståande programfaga me tilbyr. Her får du lære friluftsliv i praksis og dra på spanande turar i vakker natur. Bli med på kajakkturar i skjergarden i Austrheim, skiturar i Stølsheimen og fotturar på Hardangervidda. Dette faget gir deg minner for livet og ei unik avveksling frå klasserommet.

Breddeidrett – variert og nyttig

Vil du ha ein aktiv og spennande skulekvardag der du får prøve ulike idrettar, utfordre deg sjølv og oppleve meistring? Breddeidrett som programfag gir deg ikkje berre betre fysisk form, men også ferdigheiter i samarbeid, sjølvdisiplin og planlegging. Dette faget handlar om å utforske, lære og finne glede i aktivitet, uansett nivå.

I tillegg er det eit nyttig grunnlag for vidare utdanning innan idrett, helse, pedagogikk eller treningsrelaterte fag. Om du drøymer om å bli trenar, fysioterapeut, lærar eller jobbe med folkehelse, er breddeidrett eit perfekt første steg!

Vel studiespesialisering hjå oss og ta det første steget mot draumane dine!

Programfagtilbodet på studiespesialisering: