Naturbruk

Vg1 naturbruk

På vg1 naturbruk brukar me mykje tid i oppstarten til å verte kjende, slik at ein byggjer eit godt klassemiljø. Austrheim vgs har blå profil på naturbruk, og er såleis mest retta mot akvakultur (oppdrett av fisk og anna sjømat) og fiske. Skulen har godt samarbeid med dei to visningssentra for akvakultur i regionen (eit i Gulen og eit i Alver), og ein del av undervisninga i programfaga vil skje på desse.

Båtførarprøven og grunnleggande sikkerheitskurs for sjøfolk vil vere inkludert i opplæringa. På vg1 vil du også få dekka eit minimum også knytt til den grøne delen av naturbruk med landbruk som den viktigaste. Klassen vil vera ein del ute i naturen og natur og friluftsliv vil vera viktige deler av undervisninga.

Skulen har tett samarbeid med bedrifter, og du vil om lag ti veker av skuleåret vere utplassert i bedrift. I utgangspunktet tenkjer me utplassering i oppdrettsnæringa, men dersom du har ynskje innan fiske og fangst eller i landbruk, vil me leggje til rette for det. I undervisninga vert det lagt opp til ei rekkje bedriftsbesøk. 

Me prøver å gjere teoridelen av programfaga så praktisk som mogleg. I fellesfaga legg me vekt på å yrkesrette dei mest mogleg, slik at du som elev ser samanhengen mellom til dømes matematikk og naturfag, og det å arbeide på eit oppdrettsanlegg. 

Søk opptak via VigoLæreplan vg1 naturbruk

Vg2 akvakultur

Oppdrett av ulike artar er ei av Noregs viktigaste næringar, og denne næringa vil i framtida berre fortsetje å vekse.

Etter skuleslutt kan du gå to år i lære i ei bedrift der du vil få fagbrev og moglegheit til å arbeide i ei næring med gode framtidsutsikter, med varierte arbeidsoppgåver og gode løns- og arbeidsvilkår.  Vg2 akvakultur gjev deg teori til fagprøven i tillegg til allmenne fag, slik at du med eit påbyggingsår får generell studiekompetanse. Dersom du ser for deg ei høgare utdanning på universitet eller høgskule (marinbiologi, sivilingeniør i havbruk mfl.) vil eit slikt utdanningsløp være midt i blinken.

I løpet av skuleåret får du tilbod om dekksoffiser kompetansesertifikat klasse 6 (D6), stroppe og anhukerkurs (G11 + G20) og VHF-kurs.

På vg2 akvakultur vil du vere utplassert omlag 10-12 veker i bedrift, og mesteparten av den praktiske delen av opplæringa vil skje der, medan teoridelen av programfaga og fellesfaga vert på skulen. Klassen vil ha tett samarbeid med lokale oppdrettsselskap som bidreg inn i undervisninga med sin kunnskap og erfaring. Utdanninga vil såleis skje i tett samarbeid med næringslivet. 

Lærarane på Austrheim vgs bidrar og hjelper, slik at alle som fullfører og består truleg vil få læreplass. 

Søk opptak via Vigo

Læreplan vg2 akvakultur